PK- टोटल लुल्ल बटा दुई है ई पिच्चर

हमरे गोला पर ऐक बहुतै डेंजर रांग नम्बर है...लोगन क बात बिना सुने आपन फैईसला दई देये वाला रांग नम्बर. बात सुनौ ना सुनौ, आधा सुनौ पूरा बूझो और मुंडी हिलाय देयो...”अच्छा, अच्छा भेरी गुड्ड भेरी गुड्ड” कहि के... औ, जब कौनो बोले की हमरा पूरा बात सुनो तो पाहिले, तौ कहो “अच्छाSSS!!! अब तू हमको सिखाये रिया है”

हम देखत रहा की बहुतय लोग ई आमिर खान औ राजकुमरा के नवका पिच्चरवा के बुराई करत है औ बहुते लोग एकर तारीफ़ करत है. तौ हम सोचा की एह बात कए फईसला बिना पिच्चरवा देखे कईसे होई?

परसों हमरी एक दोस्त बोलिस की हम जनवरी लास्ट मा ई पिच्चर तोहरे साथे देखब काहे से की अबिही टाइम के बहुते कमी है. तौ, हम ओकर बात मानि के बोला “अच्छा...ठीक है” काहे से कि पिच्चरवा रिलीज होई के बाद कहूँ भाग थोरे जात है? लेकिन कल हमरा एक और दोस्त बोला के भाई एह पिच्चर को देखना है. रात के बखत टाइम खाली रहा...हम सोचा के देख लेवेमा का बुराई है? जौ पिच्चर बढ़िया रहा तौ जनवरी लास्ट में येक बार अउर देखि लिहा जाई नाइ तौ ओका दूसर पिच्चर दिखाई दिहा जाई.

हम पिच्चर देखा...फुल कनसनटीरेशन के साथ. सुने रहे की ई पिच्चर मा बहुते घालमेल वाला बात कहा गय है मगर जब हम पिच्चर देखा तो पता लगा की ई पिच्चर तो टोटल लुल्ल बटा दुई है. मतलब की आधा लुल्ल है.

एक ठो परग्रही हमरे देश मा उतरत है. वईसे तो हालीबूड वालन के हिसाब से हर बार अमरीका में उतरत है मगर एहि बार अपने देस की धरती पर उतरत है. नंगा...जईसे उ टर्मिनेटर वाला हीरउआ उतरत है. यकदम नंगा...अइसे टुकुर टुकुर का निहारत हौ? अपने हियाँ सेंसर बोर्ड के काम पूरा नंगई देखाइब नाइ हौ.  

मगर ई परग्रहिया केहू के सताई के ओकर कपडा नाही लेत. उ तौ ‘डांसिंग कार’ से आपन कपडा लत्ता के जुगाड़ करत है. हमका ई अभहिन् तक समझ में नाइ आवा कि ई डांसिंग कार एतना थोक के भाव कउन सहर मा मिलत है?

खैर, जईसे अब हम लोग केहू के दरवज्जा पर पहुँच के घंटी बजावे के जगही ओकरे नंबर पर मोबाइल से मिस कॉल मारत हैं की हे सुनौ हो, बहरे निकरो..वईसे उ परग्रहिया के जरूरत है अपना रिमोटवा का ताके सिगनल मार के आपन जहाजिया वापस धरती पर बुलावे. मगर हियाँ ओकर रिमोटवा एक गिरहकट लई के भागि जात है. ससुरा ईहौ नहि सोचिस की आन ग्रह पर अपने ग्रह क्य काव इज्जत रहि जाई.

एह्मा ऐक ठो हीरोईनिउ है...अपने सरमा जी के बिटिया अनुस्का सरमा. मगर पिच्चर मा ओकर नाम बिगाड़ के औ ऊपर से चौखटा बिगाड़ कए का मिला ई समझ में नाहि आवा. अब हमरे उ तिसरे दोस्तवा के का होई जउन ओनकर पोस्टर अपने कमरा के दरवज्जे के पीछे चिपकाये रहे.

हिंद्स्तानी लइकी औ पाकिस्तानी लइका के प्रेम विदेस में परवान चढत है. ई हिन्दू उ मुस्लिम. लेकिन लइका लइकी के प्रेम सफल न होवे पावत है. लइकी अपने देस में, दिल्ली में आई जात है जहाँ उका मिलत है पियरका  हेलमेटवा पहिरे घुमत ‘पीके’ उ सबके परचा बाँटत रहा की भगवान लापता होई गय हैं...कौनो के मिले तो पीके के बतावे. काहे से की उ जहाँ जहाँ आपन रिमोट पूछा ओका हर आदमी बोला की तोहर रिमोट तौ अब भगवाने दिलाये सकत हैं. तौ उ भगवान् के लगल खोजे.

बहुते खोजत है मगर ना भगवान् मिलत हैं औ ना मिलत है रिमोटवा.

फिर आपन हिरोईनी मदद करत ही ओकर रिमोट पावे में औ उ मदद करत है हिरोईनी के प्रेमी पावे में. सबके आपन आपन आइटम मिल जात है. बस कहानी ख़तम. हैपीज़ एंडिंग.

सबके एकटिंग बढिया है. सबसे बम्पर प्वाइंट रहा मगन परग्रहिया भोजपुरी बोलत रहा और एके साल में उ अपने गोला परसे अपने जैसन और लइके जब वापस हियाँ आवा तौ एक मिला जौन हियाँ के रनबीर कपुरवा टाइप लागत रहा, ओहू के तनकी तनकी भोजपुरी सिखाई के लावा रहा.   

लेकिन तौ फिर झोल केहर है?

ई पिच्चर मा रजुआ भटक गवा है. बात सुरु किहे गाँधी जी के प्रतीक बनाई के सिस्टम के गड़बड़झाला से औ लई जाई के ख़तम किहे हिन्दू मुस्लिम एकता पे. ओहपर से लईका लईकी के इंटरनेसनल प्यार. लईकी- परगरही के प्यार. भक बुडबक. कहानी के लाइन और लेंथ मा बिगहा भर के फरक आई गवा.

अब बहुते लोग एकर बिरोध करत हैं की ई हमरे धरम पर आघात है. लेकिन सिनेमा के पोस्टर फाड़े से का होई. अइसन काम से केकर फ़ायदा होई? अरे करहीके है तौ जउन जउन बातन पर उंगली उठत है ओकर शंका समाधान करो. औ अइसन मौके काहे देव, की केहू तोहरे ऊपर उंगली उठावे. सांति से जउन भरम है, तउन दूर करो. जउन कमी है, तउन दूर करो.

एह मुद्दा पे इहसे जियादा बढ़िया पिच्चर रहे ‘ओ माई गॉड’.